Ar bwy rydych chi'n gwrando?
Ystyried yr hyn sy’n ein harwain trwy fywyd.
gan Helen Bryant
Addas ar gyfer
- Ysgol gyfan (Uwchradd)
Nodau / Amcanion
Ystyried yr hyn sy’n ein harwain trwy fywyd.
Paratoad a Deunyddiau
- Dim angen paratoi deunyddiau, ond efallai yr hoffech chi ddefnyddio eich stori eich hun yn hytrach na’r stori sy’n cael ei rhoi yma yng Ngham 2 y gwasanaeth.
- Trefnwch fod gennych chi recordiad o’r gân, ‘Father and son’ gan Cat Stevens a’r modd o’i chwarae ar ddiwedd y gwasanaeth.
Gwasanaeth
- Faint ohonoch chi sy'n well am roi cyngor i eraill yn hytrach na derbyn cyngor oddi wrthyn nhw?
Byddai'r mwyafrif ohonom, rwy'n dychmygu, yn hoffi torri ein cwys ein hunain a dewis ein llwybr ein hunain, hyd yn oed os byddwn ni’n canfod wedyn mai'r cyngor a gawsom yn wreiddiol oedd y cyngor gorau. - Pe byddem yn derbyn punt am bob tro yr oedd yr hyn roedd ein rhieni'n ei ddweud yn gywir, fe fyddem o bosib yn gyfoethog! Er enghraifft, pan oeddwn i yn 15 oed, fe ddywedodd fy nhad wrthyf, ‘Wyt ti wedi meddwl mynd i addysgu?’ Gan wadu ei fod yn hollol gywir, fel arfer, fe wnes i ddilyn yn ddi-ildio gwrs cyfnewidiol yn y gyfraith ar derfyn fy nghwrs gradd, oherwydd roeddwn yn meddwl fy mod eisiau bod yn gyfreithiwr. Tua hanner ffordd trwy fy astudiaethau fe wnes i ffonio fy nhad mewn dagrau i ddweud nad oeddwn eisiau mynd ymlaen â'r cwrs, ac roeddwn eisiau bod, dyfalwch beth, yn athro astudiaethau crefyddol!
- Roedd fy nhad, wrth gwrs, yn llygad ei le, oherwydd roedd wedi byw canran dda o'i fywyd, ac wedi gwneud camgymeriadau a phrofi mwy o newidiadau na’r hyn roeddwn i wedi eu gwneud. Rwy'n ddiolchgar, fodd bynnag y bydd rhieni y rhan fwyaf o'r amser yn osgoi adrodd y geiriau clasurol, ‘Fe ddywedais i yn do’, hyd yn oed os oedden nhw'n eu meddwl!
- Felly, pam rydyn ni’n rhai mor wael am dderbyn arweiniad, hyd yn oed er ei fod er ein budd, ac er ein lles?
O bosib, y gwirionedd yw ein bod yn hoffi cynnal ein hannibyniaeth ein hunain a'n hymreolaeth ein hunain, oddi wrth bobl fel ein rhieni, yn enwedig wrth i ni dyfu.
Mae'n bwysig i ni i allu gwneud camgymeriadau ein hunain a dysgu oddi wrthyn nhw, ond mae'n fy nharo y byddai’n bosib i lawer o'n pryder a'n straen gael ei ryddhau pe byddem ddim ond yn gwrando ar rai o'r cynghorion sydd ar gael i ni yn hytrach na'u gwrthod ar ein hunion. - I'r rhai ohonoch sydd ym Mlwyddyn 7, fe fyddwch chi wedi cael eich arwain gan nifer o ffactorau pan oeddech yn dewis pa ysgol uwchradd i’w mynychu. Ym Mlwyddyn 9, eich opsiynau TGAU yw'r hyn y byddwch chi'n meddwl amdanyn nhw ac ym Mlwyddyn 11, eich Lefel A fydd ar eich meddwl chi. Bydd y rhai ohonoch sydd yn y chweched dosbarth yn ystyried eich opsiynau ar gyfer pa brifysgol y byddwch yn ei dewis, neu a fyddwch yn cymryd blwyddyn allan ai peidio, neu’n dewis rhwng byd gwaith ac addysg uwch.
Mae gyrfa academaidd pawb yn frith o'r angen i wneud penderfyniadau. Mae'n bwysig iawn eich bod yn siwr eich bod yn derbyn yr arweiniad priodol wrth i chi wneud y penderfyniadau hynny. Ceisiwch wrando ar y cyngor a gewch, er mai chi, yn y diwedd, fydd â'r hawl i wneud y penderfyniadau terfynol.
Amser i feddwl
Peidiwch â bod yn ofnus, fodd bynnag, i ystyried opsiynau eraill os byddwch yn teimlo bod yr arweiniad neu'r llwybr posib y cewch ei anfon ar ei hyd ddim yr un yr ydych chi’n hollol gyfforddus yn ei gylch. Weithiau gall y deilliannau gorau mewn unrhyw sefyllfa arwain at ffordd sydd heb ei throedio lawer, ond bydd hynny'n golygu y bydd yn rhaid i chi fod yn ddewr a chymryd siawns. Mae hynny'n iawn a dylid ei annog, ond gwnewch yn siwr eich bod yn cyrraedd at benderfyniad cytbwys, gan ystyried yr arweiniad a roddir i chi yn ogystal. Pwy â wyr pa lwybr y byddwch yn ei ddilyn efallaipe byddech yn ystyried yr holl opsiynau'n ofalus.
Cerddoriaeth
Cerddoriaeth ychwanegol
‘Father and son’ gan Cat Stevens
