Torri Cyfeillgarwch
Annog y plant i feddwl pa mor bwysig yw cyfeillgarwch, a sut y gall perthynas ddrwg â rhywun effeithio ar lawer o bobl eraill.
gan Rebecca Parkinson
Addas ar gyfer
- Ysgol gyfan (Gynradd)
Nodau / Amcanion
Annog y plant i feddwl pa mor bwysig yw cyfeillgarwch, a sut y gall perthynas ddrwg â rhywun effeithio ar lawer o bobl eraill.
Paratoad a Deunyddiau
- Cyn y gwasanaeth, rhowch stribed cul o bapur i bob plentyn mewn un dosbarth, a gofynnwch i bob un ysgrifennu ei enw ar y papur. Gwnewch ddolen ag un stribed a gludio’r ddau ben ynghyd. Gwthiwch stribed arall trwy’r ddolen a gludio’r pennau gyda’i gilydd eto, fel o’r blaen. Daliwch i wneud hyn nes bydd y stribedi i gyd yn ffurfio cadwyn bapur.
- Dewisol: Dewiswch ffotograff o ffrind, neu aelod o’ch teulu, sydd wedi bod yn bwysig i chi yn eich bywyd.
Gwasanaeth
- Gofynnwch i’r plant gau eu llygaid am foment a meddwl am un o’u ffrindiau. Fe all y ffrind hwnnw fod yn rhywun o’r ysgol, neu’n rhywun sy’n byw yn ymyl eu cartref, neu hyd yn oed yn aelod o’u teulu.
Holwch y plant beth sy’n gwneud yr unigolyn hwnnw’n ffrind da. Dangoswch y llun o’ch ffrind chi i’r plant a/ neu dywedwch wrthyn nhw pam y mae’r ffrind hwnnw wedi bod mor bwysig i chi. - Dangoswch y gadwyn bapur i’r plant, ac eglurwch fod y gadwyn wedi’i llunio gan blant o un dosbarth neilltuol. Eglurwch efallai nad yw pob un yn y dosbarth yn gallu bod yn ‘ffrindiau gorau’ i bob un arall, ond maen nhw i gyd wedi’u huno mewn un ffordd arbennig oherwydd eu bod yn aelodau o’r un dosbarth. Fe fyddan nhw’n mynd trwy’r ysgol gyda’i gilydd, gan dreulio llawer o amser wythnos ar ôl wythnos yng nghwmni ei gilydd.
- Gofynnwch i’r plant ydyn nhw wedi cweryla ryw dro gyda’u ffrindiau. Holwch sut roedden nhw’n teimlo bryd hynny?
Gofynnwch i un plentyn ddod i afael yn un pen y gadwyn tra rydych chi’n gafael yn y pen arall. Dywedwch wrth y plant fod yr holl bobl sydd yn y gadwyn wedi eu huno. Ond pan fydd dau yn cweryla, neu’n torri eu cyfeillgarwch, mae’n effeithio ar y rhai eraill sydd o’u cwmpas. Tynnwch y gadwyn nes bydd un o’r dolenni’n agor a’r gadwyn yn torri. Eglurwch mai dim ond y cysylltiad rhwng dau blentyn sydd wedi torri, ond mae’r gadwyn gyfan wedi cwympo oherwydd hynny. - Soniwch wrth y plant, pan fydd gennym ni broblemau yn ein cyfeillgarwch, bod angen i ni eu datrys ar unwaith fel na fydd effaith ein cwerylon ni yn amharu ar yr holl bobl eraill sydd o’n cwmpas.
- Mae’r Beibl yn dangos bod Iesu’n credu bod cyfeillgarwch yn beth pwysig iawn. Un o’r pethau cyntaf a ddarllenwn yn y Beibl am Iesu yw ei hanes yn casglu grwp o ffrindiau ato (y disgyblion). Fe fyddai’r ffrindiau hyn gydag ef trwy’r adegau da a’r adegau drwg. Ac er eu bod yn anghydweld â’i gilydd ambell dro, fe arhosodd y rhain gydag Iesu trwy ei fywyd.
Amser i feddwl
Myfyrdod
Gofynnwch i’r plant fod yn dawel am foment i feddwl am eu ffrindiau, am blant eraill sydd yn yr un dosbarth â nhw, neu am aelodau o’u teuluoedd. Oes rhywun ymysg y rhain y dylen nhw ddweud ‘sori’ wrthyn nhw? Ydi hi’n bosib iddyn nhw benderfynu gwneud hynny, a datrys unrhyw broblem sy’n bod rhyngddyn nhw?
Gweddi
Annwyl Dduw,
Diolch dy fod ti wedi rhoi ffrindiau i ni.
Helpa ni, os gweli di’n dda, i fod yn ffrindiau da.
Helpa ni, os gweli di’n dda, i ddatrys unrhyw gwerylon ar fyrder,
ac i chwilio am yr hyn sy’n dda mewn pobl eraill, bob amser.
Amen.
